ਆਸਟ੍ਰੇਲੀਆਈ ਸਰਕਾਰ ਨੇ ਕੰਸਟਰਕਸ਼ਨ ਵੀਜ਼ਾ ਸਬਸਿਡੀ ਪ੍ਰੋਗਰਾਮ ‘ਚ ਕੀਤੇ ਹੋਰ ਕੰਮ ਸ਼ਾਮਿਲ

ਵੈਸਟਰਨ ਆਸਟ੍ਰੇਲੀਆ ਦੇ ਕੰਸਟਰਕਸ਼ਨ ਵੀਜ਼ਾ ਸਬਸਿਡੀ ਪ੍ਰੋਗਰਾਮ ਵਿੱਚ ਉਸਾਰੀ ਉਦਯੋਗ ਨਾਲ ਸੰਬੰਧਿਤ ਕਿੱਤੇ ਜਿਵੇਂ ਕਿ ਸਿਵਲ ਇੰਜੀਨੀਅਰ, ਕਾਰਪੈਂਟਰ, ਪਲੰਬਰ, ਬ੍ਰਿਕਲੇਯਰਜ਼, ਵੈਲਡਰ, ਟਾਇਲਰ, ਇਲੈਕਟ੍ਰੀਸ਼ੀਅਨ, ਲੈਂਡਸਕੇਪਿੰਗ ਆਦਿ ਵਰਗੇ ਤਕਰੀਬਨ 59 ਇਨ-ਡਿਮਾਂਡ ਕਿੱਤੇ ਸ਼ਾਮਿਲ ਕੀਤੇ ਗਏ ਹਨ।

WA ਦੀ ਸਰਕਾਰ ਨੇ ਵਿਦੇਸ਼ੀ ਅਤੇ ਰਾਜ ਵਿੱਚ ਬਿਲਡਿੰਗ ਅਤੇ ਕੰਸਟ੍ਰਕਸ਼ਨ ਉਦਯੋਗ ‘ਚ ਕੰਮ ਕਰ ਰਹੇ ਹੁਨਰਮੰਦ ਕਾਮਿਆਂ ਨੂੰ ਸਪਾਂਸਰ ਕਰਨ ਲਈ ਇੱਕ ਵੀਜ਼ਾ ਸਬਸਿਡੀ ਪ੍ਰੋਗਰਾਮ ਦਾ ਐਲਾਨ ਕੀਤਾ ਹੈ। ‘ਕੰਸਟਰਕਸ਼ਨ ਵੀਜ਼ਾ ਸਬਸਿਡੀ ਪ੍ਰੋਗਰਾਮ’ (CVSP) ਯੋਗ ਬਿਲਡਿੰਗ ਅਤੇ ਨਿਰਮਾਣ ਅਧਾਰਿਤ ਕੰਪਨੀਆਂ ਨੂੰ ਹਰ ਇੱਕ ਵਿਦੇਸ਼ੀ ਕਾਮੇ ਲਈ $10,000 ਤੱਕ ਦੀ ਸਬਸਿਡੀ ਦੀ ਪੇਸ਼ਕਸ਼ ਕਰਦਾ ਹੈ।

ਇਹ ਸਬਸਿਡੀਆਂ WA ਦੇ ਬਹੁਤ ਸਾਰੇ ਛੋਟੇ ਉਸਾਰੀ ਕਾਰੋਬਾਰਾਂ ਲਈ ਸੁਆਗਤੀ ਖ਼ਬਰਾਂ ਵਜੋਂ ਆਉਂਦੀਆਂ ਹਨ – ਜਿਨ੍ਹਾਂ ਵਿੱਚੋਂ ਬਹੁਤ ਸਾਰੇ ਵਿਦੇਸ਼ੀ ਕਾਮਿਆਂ ਨੂੰ ਸਪਾਂਸਰ ਕਰਨ ਨਾਲ ਜੁੜੇ ਉੱਚ ਖਰਚਿਆਂ ਨੂੰ ਜਾਇਜ਼ ਠਹਿਰਾਉਣ ਵਿੱਚ ਅਸਮਰੱਥ ਰਹੇ ਹਨ।

ਪਰਥ ਤੋਂ ਪ੍ਰਵਾਸ ਮਾਹਰ ਨਰਿੰਦਰ ਕੌਰ ਸੰਧੂ ਨੇ ਦੱਸਿਆ ਕਿ $11 ਮਿਲੀਅਨ ਡਾਲਰ ਦਾ ਇਹ ਪ੍ਰੋਜੈਕਟ 1 ਜੁਲਾਈ 2023 ਨੂੰ ਸ਼ੁਰੂ ਹੋਇਆ ਸੀ ਅਤੇ WA ਦੇ ਰਿਹਾਇਸ਼ੀ ਅਤੇ ਵਪਾਰਕ ਨਿਰਮਾਣ ਉਦਯੋਗ ਵਿੱਚ ਗੰਭੀਰ ਹੁਨਰ ਦੀ ਘਾਟ ਨੂੰ ਦੂਰ ਕਰਨ ਲਈ ਸਰਕਾਰ ਦਾ ਅਜੇ ਤੱਕ ਦਾ ਸਭ ਤੋਂ ਵੱਡਾ ਉੱਦਮ ਹੈ।

“ਪ੍ਰਵਾਸੀਆਂ ਨੂੰ 491 ਅਤੇ 190 ਵੀਜ਼ਿਆਂ ‘ਤੇ ਪਰਥ ਆਉਣ ਲਈ $10000 ਦਾ ਭੁਗਤਾਨ ਕੀਤਾ ਜਾਵੇਗਾ ਅਤੇ ਮਾਲਕਾਂ ਨੂੰ 482, 494 ਪ੍ਰੋਗਰਾਮਾਂ ‘ਤੇ ਸਪਾਂਸਰ ਵਰਕਰਾਂ ਨੂੰ ਭੁਗਤਾਨ ਕੀਤਾ ਜਾਵੇਗਾ”, ਉਨ੍ਹਾਂ ਕਿਹਾ।

ਨਰਿੰਦਰ ਨੇ ਅੱਗੇ ਦੱਸਿਆ ਕਿ ਸਿਵਲ ਇੰਜੀਨੀਅਰ, ਪ੍ਰੋਜੈਕਟ ਮੈਨੇਜਰਾਂ ਤੋਂ ਲੈਕੇ ਕਾਰਪੈਂਟਰ, ਪਲੰਬਰ,ਬ੍ਰਿਕਲੇਯਰਜ਼,ਵੈਲਡਰ, ਟਾਇਲਰ, ਇਲੈਕਟ੍ਰੀਸ਼ੀਅਨ, ਲੈਂਡਸਕੇਪਿੰਗ ਆਦਿ ਤੱਕ ਬਿਲਡਿੰਗ ਅਤੇ ਕੰਸਟ੍ਰਕਸ਼ਨ ਇੰਡਸਟਰੀ ਨਾਲ ਸੰਬੰਧਿਤ ਕਿੱਤਿਆਂ ਦੀ ਸੂਚੀ ਵਿੱਚ ਤਕਰੀਬਨ ਹਰ ਤਰ੍ਹਾਂ ਦੇ 59 ਇਨ-ਡਿਮਾਂਡ ਕਿੱਤੇ ਸ਼ਾਮਿਲ ਹਨ।

“ਵਿਦੇਸ਼ਾਂ ਦੇ ਨਾਲ ਨਾਲ, ਇਸ ਦਾ ਸਬਸਿਡੀ ਪ੍ਰੋਗਰਾਮ ਦਾ ਉੱਦੇਸ਼ ਇਮਾਰਤ ਅਤੇ ਉਸਾਰੀ ਉਦਯੋਗ ਵਿੱਚ ਦੂਜੇ ਰਾਜਾਂ ‘ਚੋਂ ਹੁਨਰਮੰਦ ਪ੍ਰਵਾਸੀਆਂ ਨੂੰ ਆਕਰਸ਼ਿਤ ਕਰਨਾ ਵੀ ਹੈ ਅਤੇ ਸਬ-ਕਲਾਸ 190 ਅਤੇ 491 ਹੁਨਰਮੰਦ ਵੀਜ਼ਾ ਧਾਰਕ ਇੱਕੋ ਕਿਸਮ ਦੇ ਪੁਨਰ-ਸਥਾਨ ਦੇ ਖਰਚਿਆਂ (ਵੀਜ਼ਾ ਫੀਸ, ਵਕੀਲਾਂ ਦੀ ਫੀਸਾਂ ਦਾ ਭੁਗਤਾਨ ਆਦਿ) ਨੂੰ ਪੂਰਾ ਕਰਨ ਲਈ $10,000 ਤੱਕ ਦੀ ਸਬਸਿਡੀ ਲਈ ਯੋਗ ਹੋਣਗੇ।

ਇਸ ਪ੍ਰੋਗਰਾਮ ਦੇ ਅਧੀਨ 2 ਸਟ੍ਰੀਮਾਂ ਹਨ – ਕਾਰੋਬਾਰਾਂ ਲਈ “ਇਮਪਲੌਏਰ ਸਪਾਂਸਰਡ ਸਟ੍ਰੀਮ” ਅਤੇ ਵਿਅਕਤੀਆਂ ਲਈ “ਸਟੇਟ ਨੌਮੀਨੇਸ਼ਨ ਸਟ੍ਰੀਮ”।