ਸਾਬਕਾ ਟੀਚਰ ਕਰਦਾ ਸੀ ਭਾਰਤੀ ਬੱਚਿਆਂ ਨਾਲ ਬਦਸਲੂਕੀ, ਅਦਾਲਤ ਨੇ ਸੁਣਾਈ ਸਜ਼ਾ

ਬ੍ਰਿਟਿਸ਼ ਪ੍ਰਾਇਮਰੀ ਸਕੂਲ ਦੇ ਇੱਕ 35 ਸਾਲਾ ਸਾਬਕਾ ਅਧਿਆਪਕ, ਜਿਸਦੀ ਦੀ ਪਛਾਣ ਦੱਖਣੀ ਲੰਡਨ ਦੇ ਈਸਟ ਡੁਲਵਿਚ ਦੇ ਰਹਿਣ ਵਾਲੇ ਮੈਥਿਊ ਸਮਿਥ ਵਜੋਂ ਹੋਈ ਹੈ, ਨੂੰ ਭਾਰਤੀ ਬੱਚਿਆਂ ਦਾ ਜਿਨਸੀ ਸ਼ੋਸ਼ਣ ਕਰਨ ਦੇ ਮਾਮਲੇ ਵਿੱਚ ਲੰਡਨ ਦੀ ਜ਼ਿਲ੍ਹਾ ਅਦਾਲਤ ਨੇ 12 ਸਾਲ ਕੈਦ ਦੀ ਸਜ਼ਾ ਸੁਣਾਈ।

ਬ੍ਰਿਟੇਨ ਦੀ ਨੈਸ਼ਨਲ ਕ੍ਰਾਈਮ ਏਜੰਸੀ ਦਾ ਕਹਿਣਾ ਹੈ ਕਿ “ਸਮਿਥ ਨੂੰ ਪਿਛਲੇ ਸਾਲ ਨਵੰਬਰ ‘ਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਜਾਂਚ ਦੌਰਾਨ ਇਹ ਗੱਲ ਸਾਹਮਣੇ ਆਈ ਕਿ ਉਹ 17-18 ਸਾਲ ਦੇ ਭਾਰਤੀ ਬੱਚਿਆਂ ਨਾਲ ਸੰਪਰਕ ਕਰਦਾ ਸੀ ਅਤੇ ਉਨ੍ਹਾਂ ਨੂੰ ਪੈਸਿਆਂ ਦੇ ਬਦਲੇ 13 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਦੇ ਜਿਨਸੀ ਸ਼ੋਸ਼ਣ ਦੀਆਂ ਫੋਟੋਆਂ ਅਤੇ ਵੀਡੀਓ ਦੇਣ ਲਈ ਕਹਿੰਦਾ ਸੀ।”

ਜਾਂਚ ਏਜੰਸੀ ਨੇ ਕਿਹਾ ਕਿ “ਮੈਥਿਊ ਸਮਿਥ ਨੂੰ ਬਾਲ ਪੀੜਤਾਂ ਨਾਲ ਕੋਈ ਹਮਦਰਦੀ ਨਹੀਂ ਹੈ। ਉਹ ਘੱਟ ਉਮਰ ਦੇ ਨੌਜਵਾਨਾਂ ਨੂੰ ਬੱਚਿਆਂ ਨਾਲ ਦੁਰਵਿਵਹਾਰ ਕਰਨ ਲਈ ਮਜਬੂਰ ਕਰਦਾ ਸੀ। ਦੋਸ਼ੀ ਵਿਅਕਤੀ ਅਜਿਹੇ ਮੌਕੇ ਲੱਭਦਾ ਰਿਹਾ, ਜਿਸ ਤਹਿਤ ਉਹ ਭਾਰਤੀ ਬੱਚਿਆਂ ਤੱਕ ਵੱਧ ਤੋਂ ਵੱਧ ਪਹੁੰਚ ਕਰ ਸਕੇ।”

ਜਾਂਚ ਏਜੰਸੀ ਨੇ ਇਹ ਵੀ ਦਾਅਵਾ ਕੀਤਾ ਕਿ ਸਾਬਕਾ ਅਧਿਆਪਕ ਸਮਿਥ ਗ੍ਰਿਫ਼ਤਾਰੀ ਦੇ ਸਮੇਂ ਵੀ ਆਨਲਾਈਨ ਸੀ ਅਤੇ ਭਾਰਤ ਵਿੱਚ ਰਹਿਣ ਵਾਲੇ ਇੱਕ ਨਾਬਾਲਗ ਬੱਚੇ ਨਾਲ ਗੱਲ ਕਰ ਰਿਹਾ ਸੀ। ਉਹ ਇਸ ਬੱਚੇ ਨੂੰ ਮੋਟੀ ਰਕਮ ਦੀ ਪੇਸ਼ਕਸ਼ ਕਰ ਰਿਹਾ ਸੀ ਅਤੇ ਬਦਲੇ ਵਿਚ ਉਸ ਨੂੰ ਕਿਸੇ ਹੋਰ ਛੋਟੇ ਬੱਚੇ ਦੀਆਂ ਜਿਨਸੀ ਤਸਵੀਰਾਂ ਭੇਜਣ ਲਈ ਕਹਿ ਰਿਹਾ ਸੀ। ਸਮਿਥ ਦੇ ਕੰਪਿਊਟਰ ‘ਤੇ ਡਾਰਕ ਵੈੱਬ ਵੀ ਖੁੱਲ੍ਹਿਆ ਹੋਇਆ ਸੀ।

ਐਨਸੀਏ ਦੇ ਬਿਆਨ ਅਨੁਸਾਰ ਮੈਥਿਊ ਸਮਿਥ ਬੱਚਿਆਂ ਲਈ ਵੱਡਾ ਖ਼ਤਰਾ ਹੈ। ਇਹ ਯਕੀਨੀ ਬਣਾਇਆ ਗਿਆ ਹੈ ਕਿ ਉਹ ਲੰਮਾ ਸਮਾਂ ਜੇਲ੍ਹ ਵਿੱਚ ਬਿਤਾਏ। ਉਸ ਦੀਆਂ ਚੈਟਾਂ ਅਤੇ ਬੈਂਕ ਸਟੇਟਮੈਂਟਾਂ ਦੀ ਜਾਂਚ ਕੀਤੀ ਗਈ, ਜਿਸ ਤੋਂ ਪਤਾ ਲੱਗਾ ਕਿ ਉਸ ਨੇ ਬਾਲ ਜਿਨਸੀ ਸ਼ੋਸ਼ਣ ਲਈ ਭਾਰਤ ਵਿੱਚ ਰਹਿ ਰਹੇ ਇੱਕ ਕਿਸ਼ੋਰ ਨੂੰ ਕੁੱਲ £65,398 ਦਾ ਭੁਗਤਾਨ ਕੀਤਾ ਸੀ। ਉਹ ਰੁਪਏ ਦੇ ਬਦਲੇ ਜਿਨਸੀ ਹਰਕਤਾਂ ਕਰਨ ਦੀਆਂ ਹਦਾਇਤਾਂ ਦਿੰਦਾ ਸੀ।

ਇੰਨਾ ਹੀ ਨਹੀਂ, ਉਹ ਉਨ੍ਹਾਂ ਨੂੰ ਉਦਾਹਰਣ ਦੇ ਤੌਰ ‘ਤੇ ਫੋਟੋਆਂ ਅਤੇ ਵੀਡੀਓ ਵੀ ਭੇਜਦਾ ਸੀ। ਬੱਚਿਆਂ ਨੂੰ ਨਵੇਂ ਬੱਚਿਆਂ ਨਾਲ ਉਹੀ ਕਿਰਿਆਵਾਂ ਕਰਨ ਲਈ ਕਿਹਾ ਗਿਆ ਸੀ ਜੋ ਦਿੱਤੀਆਂ ਫੋਟੋਆਂ ਅਤੇ ਵੀਡੀਓਜ਼ ਵਿੱਚ ਕੀਤਾ ਗਿਆ ਹੈ। ਐਨਸੀਏ ਵੱਲੋਂ ਇਹ ਵੀ ਦੱਸਿਆ ਗਿਆ ਕਿ ਉਨ੍ਹਾਂ ਨੇ ਮੁਲਜ਼ਮਾਂ ਖ਼ਿਲਾਫ਼ ਜਾਂਚ ਦੌਰਾਨ ਭਾਰਤੀ ਏਜੰਸੀਆਂ ਨਾਲ ਸੰਪਰਕ ਕੀਤਾ। ਜਾਣਕਾਰੀ ਸਾਂਝੀ ਕਰਦਿਆਂ ਇਨ੍ਹਾਂ ਪੀੜਤ ਬੱਚਿਆਂ ਦੀ ਪਛਾਣ ਕਰਕੇ ਉਨ੍ਹਾਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਦੀ ਅਪੀਲ ਕੀਤੀ ਗਈ।