ਮਾਨਵਤਾਵਾਦੀ ਪ੍ਰਵਾਸ 10 ਸਾਲਾਂ ‘ਚ ਸਭ ਤੋਂ ਉੱਚੇ ਪੱਧਰ ‘ਤੇ, ਹੋਰ ਵਾਧਾ ਕਰਨ ਲਈ ਲੇਬਰ ਸਰਕਾਰ ਵਚਨਬੱਧ

ਆਸਟ੍ਰੇਲੀਆ ਪ੍ਰਵਾਸ ਲਈ ਆਪਣੇ ਮਾਨਵਤਾਵਾਦੀ ਪ੍ਰੋਗਰਾਮ ਅਧੀਨ ਲਏ ਜਾਣ ਵਾਲੇ ਲੋਕਾਂ ਦੀ ਗਿਣਤੀ ਨੂੰ ਵਧਾਉਣ ਲਈ ਪੂਰੀ ਤਿਆਰੀ ਵਿਚ ਹੈ। ਇਸ ਪ੍ਰੋਗਰਾਮ ਦੇ ਤਹਿਤ ਪੁਨਰਵਾਸ ਦੀ ਗਿਣਤੀ ਹਰ ਸਾਲ 17,875 ਤੋਂ ਵੱਧ ਕੇ 20,000 ਹੋ ਜਾਵੇਗੀ।

ਮੌਜੂਦਾ ਪ੍ਰੋਗਰਾਮ ਅਧੀਨ 17,875 ਮਾਨਵਤਾਵਾਦੀ ਸਥਾਨਾਂ ਵਿੱਚੋਂ 13,570 ਸਥਾਨਾ ਨੂੰ ਕੇਂਦਰੀ ਪ੍ਰੋਗਰਾਮ ਲਈ ਨਿਰਧਾਰਿਤ ਕੀਤਾ ਗਿਆ ਸੀ, ਜਦਕਿ ਸੰਯੁਕਤ ਰਾਜ ਦੀਆਂ ਫੌਜਾਂ ਦੇ ਦੇਸ਼ ਛੱਡਣ ਤੋਂ ਬਾਅਦ ਅਤੇ ਤਾਲਿਬਾਨ ਦੁਆਰਾ ਦੇਸ਼ ‘ਤੇ ਕਬਜ਼ਾ ਕਰਨ ਨੂੰ ਧਿਆਨ ਵਿਚ ਰੱਖਦਿਆਂ ਅਫਗਾਨਿਸਤਾਨ ਦੇ ਲੋਕਾਂ ਲਈ 4,125 ਸਥਾਨ ਰਾਖਵੇਂ ਰੱਖੇ ਗਏ ਸਨ।

ਵਿਰੋਧੀ ਧਿਰ ਦੇ ਇਮੀਗ੍ਰੇਸ਼ਨ ਦੇ ਬੁਲਾਰੇ ਡੈਨ ਤੇਹਾਨ ਨੇ ਇਸ ਪ੍ਰੋਗਰਾਮ ‘ਤੇ ਸਵਾਲ ਕਰਦਿਆਂ ਪੁੱਛਿਆ ਕਿ ਕੀ ਲੇਬਰ ਪਾਰਟੀ ਨੇ ਇਹ ਸੋਚਿਆ ਹੈ ਕਿ ਇਹ ਅਤਿਰਿਕਤ ਲੋਕ ਰਹਿਣਗੇ ਕਿੱਥੇ। ਉਨ੍ਹਾਂ ਕਿਹਾ ਕਿ ਮੌਜੂਦਾ ਹਲਾਤਾਂ ਵਿਚ ਇਸ ਮੁਲਕ ਵਿਚ ਰਿਹਾਇਸ਼, ਕਿਰਾਏ, ਭੀੜ-ਭੜੱਕੇ ਅਤੇ ਵਾਤਾਵਰਣ ‘ਤੇ ਪੈਣ ਦੇ ਪ੍ਰਭਾਵ ਨਾਲ ਨਜਿੱਠਣ ਦੀ ਗੰਭੀਰ ਸਮਸਿਆ ਬਣੀ ਹੋਈ ਹੈ ਜਿਸ ਬਾਰੇ ਸਰਕਾਰ ਅਣਜਾਣ ਬਣੀ ਹੋਈ ਹੈ ਤਾਂ ਪ੍ਰਵਾਸ ਨੀਤੀਆਂ ਦੇ ਤਹਿਤ 1.5 ਮਿਲੀਅਨ ਵਾਧੂ ਲੋਕਾਂ ਨੂੰ ਆਸਟ੍ਰੇਲੀਆ ਲਿਆਉਣ ਦੀ ਕਿ ਤੁੱਕ ਬਣਦੀ ਹੈ।

ਆਸਟ੍ਰੇਲੀਆ ਦੇ ਮਾਨਵਤਾਵਾਦੀ ਪ੍ਰੋਗਰਾਮ ਅਧੀਨ ਹਰ ਸਾਲ ਹੁਣ 20,000 ਲੋਕ ਇੱਥੇ ਪੁਨਰਵਾਸ ਲੈ ਸਕਣਗੇ। ਇਸ ਸ਼੍ਰੇਣੀ ਅਧੀਨ ਪ੍ਰਵਾਸ ਦੀ ਦਰ ਭਾਵੇਂ ਪਿਛਲੇ 10 ਸਾਲਾਂ ਵਿੱਚ ਸਭ ਤੋਂ ਉਚੇ ਪੱਧਰ ਤੇ ਹੈ ਪਰ ਲੇਬਰ ਪਾਰਟੀ ਆਪਣੇ ਕੀਤੇ ਵਾਧੇ ਮੁਤਾਬਕ ਇਸ ਵਿਚ ਹੋਰ ਵਾਧਾ ਕਰਨ ਦੀ ਚਾਹਵਾਨ ਹੈ।