ਲਿਬਨਾਨ ਦੇ ਇਜ਼ਰਾਇਲੀ ਹਵਾਈ ਹਮਲੇ ‘ਚ 2 ਆਸਟ੍ਰੇਲੀਅਨਾਂ ਦੀ ਮੌਤ

ਲਿਬਨਾਨ: ਆਸਟ੍ਰੇਲੀਆ ਦੇ ਕਾਰਜਕਾਰੀ ਵਿਦੇਸ਼ ਮੰਤਰੀ ਮਾਰਕ ਡ੍ਰੇਫਸ ਨੇ ਜਾਣਕਾਰੀ ਦਿੱਤੀ ਕਿ ਇਜ਼ਰਾਈਲੀ ਹਵਾਈ ਹਮਲੇ ਵਿੱਚ ਹਿਜ਼ਬੁੱਲਾ ਲੜਾਕੂ ਦੇ ਨਾਲ ਨਾਲ ਦੋ ਆਸਟ੍ਰੇਲੀਆਈ ਨਾਗਰਿਕ ਮਾਰੇ ਗਏ ਹਨ। ਕਾਰਜਕਾਰੀ ਵਿਦੇਸ਼ ਮੰਤਰੀ ਨੇ ਦੱਸਿਆ ਕਿ ਦੱਖਣੀ ਲੇਬਨਾਨ ਦੇ ਬਿਨਤ ਜਬੇਲ ਕਸਬੇ ਵਿੱਚ ਮੰਗਲਵਾਰ ਨੂੰ ਹੋਏ ਹਵਾਈ ਹਮਲੇ ਵਿੱਚ ਇਬਰਾਹਿਮ ਬਾਜ਼ੀ ਅਤੇ ਉਸ ਦਾ ਭਰਾ ਅਲੀ ਬਾਜ਼ੀ ਮਾਰਿਆ ਗਿਆ।

ਬੇਰੂਤ ਵਿੱਚ ਆਸਟ੍ਰੇਲੀਆਈ ਦੂਤਘਰ ਲੋੜ ਪੈਣ ‘ਤੇ ਬਾਜ਼ੀ ਪਰਿਵਾਰ ਨੂੰ ਕੌਂਸਲਰ ਸਹਾਇਤਾ ਪ੍ਰਦਾਨ ਕਰਨ ਲਈ ਤਿਆਰ ਹੈ।
ਖਬਰਾਂ ਮੁਤਾਬਿਕ ਇਬਰਾਹਿਮ ਬਾਜ਼ੀ ਆਪਣੀ ਲੇਬਨਾਨੀ ਪਤਨੀ ਸ਼ੌਰੂਕ ਹਾਮੂਦ ਨਾਲ ਆਸਟ੍ਰੇਲੀਆ ਜਾਣ ਲਈ ਹਾਲ ਹੀ ਵਿੱਚ ਸਿਡਨੀ ਤੋਂ ਲੈਬਨਾਨ ਪਹੁੰਚੇ ਸਨ।

ਹਮਲੇ ਵਿੱਚ ਮਾਰੀ ਗਈ ਹਾਮੂਦ ਨੂੰ ਹਾਲ ਹੀ ਵਿੱਚ ਆਸਟ੍ਰੇਲੀਆ ਦਾ ਵੀਜ਼ਾ ਮਿਲਿਆ ਸੀ। ਉਨ੍ਹਾਂ ਦੇ ਤਿੰਨ ਤਾਬੂਤ ਫਿਲਸਤੀਨੀ ਇਸਲਾਮੀ ਧੜੇ ਹਮਾਸ ਦੇ ਸਹਿਯੋਗੀ ਹਿਜ਼ਬੁੱਲਾ ਦੇ ਝੰਡੇ ਵਿੱਚ ਲਪੇਟੇ ਗਏ ਸਨ, ਜੋ ਇਜ਼ਰਾਈਲ ਨਾਲ ਜੰਗ ਵਿੱਚ ਹੈ। ਡ੍ਰੇਫਸ ਨੇ ਕਿਹਾ ਕਿ ਆਸਟ੍ਰੇਲੀਆ ਹਿਜ਼ਬੁੱਲਾ ਦੇ ਇਸ ਦਾਅਵੇ ਦੀ ਜਾਂਚ ਕਰ ਰਿਹਾ ਹੈ ਕਿ ਅਲੀ ਬਾਜੀ ਉਸਦੇ ਲੜਾਕਿਆਂ ਵਿੱਚੋਂ ਇੱਕ ਸੀ।

ਡ੍ਰੇਫਸ ਨੇ ਪੱਤਰਕਾਰਾਂ ਨਾ ਗੱਲਬਾਤ ਕਰਦਿਆਂ ਕਿਹਾ ਕਿ ਹਿਜ਼ਬੁੱਲਾ ਆਸਟ੍ਰੇਲੀਆਈ ਕਾਨੂੰਨ ਦੇ ਤਹਿਤ ਇੱਕ ਸੂਚੀਬੱਧ ਅੱਤਵਾਦੀ ਸੰਗਠਨ ਹੈ। ਕਿਸੇ ਵੀ ਆਸਟ੍ਰੇਲੀਅਨ ਲਈ ਹਿਜ਼ਬੁੱਲਾ ਵਰਗੇ ਸੂਚੀਬੱਧ ਅੱਤਵਾਦੀ ਸੰਗਠਨ ਨਾਲ ਲੜਨ ਲਈ ਸਹਿਯੋਗ ਜਾਂ ਸਮਰਥਨ ਕਰਨਾ ਇੱਕ ਜੁਰਮ ਹੈ।

ਡ੍ਰੇਫਸ ਨੇ ਕਿਹਾ ਕਿ ਉਸਦੀ ਸਰਕਾਰ ਨੇ ਹਵਾਈ ਹਮਲੇ ਬਾਰੇ ਇਜ਼ਰਾਈਲ ਨਾਲ ਗੱਲਬਾਤ ਕੀਤੀ ਸੀ। ਡ੍ਰੇਫਸ ਨੇ ਅੱਗੇ ਕਿਹਾ,”ਮੌਜੂਦਾ ਸੰਘਰਸ਼ ਦੇ ਸੰਦਰਭ ਵਿੱਚ ਆਸਟ੍ਰੇਲੀਆ ਨੇ ਲਗਾਤਾਰ ਨਾਗਰਿਕਾਂ ਦੀਆਂ ਜਾਨਾਂ ਨੂੰ ਸੁਰੱਖਿਅਤ ਕਰਨ ਦੀ ਮੰਗ ਕੀਤੀ ਹੈ।”

ਜ਼ਿਕਰਯੋਗ ਹੈ ਕਿ ਡ੍ਰੇਫਸ ਨੇ ਆਸਟ੍ਰੇਲੀਅਨਾਂ ਲਈ ਲੇਬਨਾਨ ਦੀ ਯਾਤਰਾ ਨਾ ਕਰਨ ਦੀ ਸਰਕਾਰੀ ਚਿਤਾਵਨੀ ਨੂੰ ਦੁਹਰਾਇਆ। ਉਨ੍ਹਾਂ ਮੁਤਾਬਕ ਆਸਟ੍ਰੇਲੀਆਈ ਲੋਕਾਂ ਨੂੰ ਲੇਬਨਾਨ ਛੱਡ ਦੇਣਾ ਚਾਹੀਦਾ ਹੈ।